حسونه كان معجب ببنت وكان عايز يعلقها
حاول مع البنت بكل الطرق وفشل يقدم ليها هدايه ترفض يحاول يتكلم معها تسيبه ومتعبرهوش فواحد صحبه قال له ان البنت دى من البنات اللى بيحبو الشعر والكلام ده فحسونه قال له طيب اعمل ايه يعنى فرد صاحبه وقاله اكتبلها شعر وابعتهولها او اديه ليها بنفسك من غير ما تكلمها حسونه قال له بس انا مش بحب الشعر وعمرى ما كتبت بيت شعر واحد صاحبه قال له بسيطه فى واحد صاحبنا متخصص يكتب شعر ويبيعه للشباب عشان يقدموه للبنات على انهم هما كاتبينه ليهم حسونه قاله لايمنى عليه ابوس ايدك
فصاحبه خده لشخص اللى بيكتب شعر واتفق حسونه معه ان كل يوم يكتب له كام بيت شعر يقدمهم للبنت وفعلا كل يوم حسونه ياخد الكام بيت شعر ويدفع تمنهم ويجرى يقدمهم للبنت وهكذا اسبوع والتانى والتالت والرابع والبنت كل يوم تاخد الورقه المكتوةب فيها الشعر بدون اى تعليق او رد منها بس بقت كل يوم تنتظر حسونه يجى يقدم ليها ابيات الشعر وجات فى يوم قالت لحسونه استنه لو سمحت فوقف حسونه يشوفها حتقول ايه فقالت له انا معجبه جدا بكلامك واحساسك الراقى الزوق وكلامك بجد يجنن وانا بموت فى الشعر وخاصه اشعار نزار قبانى حسونه فرح وقال لها نزار قبانى ده حبيبى وحس ان البنت طبت خلاص فقال لها ممكن اعزمك بكره على الغدا البنت قالت اه ممكن واتفق على الميعاد والمكان وحسونه طلع جرى على صاحبه وحكة له كل شئ حصل فصاحبه قال له طيب انت كده لازم تقرى شويه فى قصائد نزار قبانى عشان تعرف تتكلم معها ومتروحش فى داهيه حسونه روح البيت فتح النت وبحث فى جوجل عن قصائد نزار قبانى المهم حسونه مقراش اى قصيده لنزار قبانى بس حفظ العناوين بتاعت القصايد وقال لنفسه مع شوية فهلوه الامور حتمشى
تانى يوم راح حسونه على الميعاد لقا البنت مستنيه فاتغر حسونه فى نفسه ودخل على البنت بقلب جامد وسلم على البنت وقعد وفضل يتكلم معها ويوصف ليها فى نفسه انه رومنسى وشاعرى وبيعشق الشعر وهى قالت له انها معجبه جدا بالكلام اللى بيكتبه وان كلامه قريب كتير من نزار قبانى فقال لها حسونه نزار ده حبيبى وكان بيسرق منى الشعر وينسبه لنفسه واحنا صغيرين فقالت البنت بتقول ايه نزار راجل كبير ومات من فتره فحسونه ارتبك وضحك وقال لها بهزر معاكى منا عارف انه مات وتعرفى اجمل قصيده قالها نزار ممكن تنطبق عليكى هى امرأه من زجاج البنت شكلها اتغير وعنيها احمرت فقالت له اكيد انت بتهزر فقال لها لا طبعا انتى تستحقى كل كلمه فيها بالعكس انتى تستحقى كلام اكتر من اللى فيها كلام القصيده مش معبر عن كل حقيقتك البنت شاطت وعيونها طقت شرار وودانها طلعت دخان وبصت شمال ويمين وفجئه شافت فاظه صغيره قدامها على التربيزه محطوط فيها ورد مسكت الورد رمته وراحت ماسكه الفاظه من رقبتها ونازله بيها على دماغ حسونه الفهلوى فتحتها فحسونه صرخ قال اى ايه ده يا مجنونه فقالت له انا جبانه انا رخيصه يا حقير يا حيوان وسابته ومشيت
حسونه روح البيت وهو مش عارف هى عملت كده ليه فتح النت وراح على قصائد نزار قبانى وشاف قصيده امرأه من زجاج وكانت الصدمه نزار فى القصيده بيسب وبيشتم وحده كانت صديقته وسابته وبيقولها رخيصه وجبانه وكلام تانى مهين فحسونه قال الله يسامحك يا نزار قبانى ضيعتنى بس هى دى اخرت الفهلوه
كتبها : رومانى حبشى
ليست هناك تعليقات:
إرسال تعليق